أنا وهوي: إدلب

هوي: مرحبا.

أنا: أهلين

هوي: هاي صارلنا زمان منحكي سوا

ماصار لازم نقول لبعض من وين نحنا!

ويعني إنسا الي قلنا بأول محادثة، بتعرف نصها كذب.

أنا:  ومين قال كذبت عليك أنا!

قلتلك من حوالي إدلب. مظبوط؟

هوي: أي صحيح وأنا قلتلك من اللاذقية.

بس أنا ماني من اللاذقية.

أنا: اي هات يشوف من وين أنت؟

هوي: اي بس يتوعدني إنو تقلي أنت كمان من وين وبصدق.

أنا: يه. اي أكيد بدون لف ودوران.

هوي: أنا من حوالي إدلب كمان.

أنا: اي يا سلام وليه كنت يعني خايف تقلي؟

هوي: والله يا أبو شريك، أنت بتعرف كيف الوضع

وإدلب صغيرة ما بدي نطلع من نفس المنطقة.

أنا: طيب حتى لو كان من نفس المنطقة وين المشكل؟

بتخاف أحكي عليك أو أفضحك بشي؟

ما نحنا لسا ما عملنا شي من أساسو ولا حكينا شي

لك لسا اسمك الكامل مو معي.

هوي: لا لا مو شغلة خوف، شغلة إنو لازم أأمنلك بالأول

وبعدين مو مهم كثير هلق هالحكي. صح؟

أنا: هلق مو مهم؛ اي مو كثير بها الفترة، بس المبدأ.

يازلمة يا دوب أنت ثاني واحد بقلي إنو من إدلب أو حواليها

وتقول إما محدا من إدلب أو إدلب محافظة وقريات مهجورة

أو بيستحوا يحكوا إنهم أدالبة.

هوي: لأ القصة مو هيك بس ضيعتنا صغيرة وإذا كنت واحد منها

ممكن هالشي يعملي وجع راس؛ وبالأخص إذا أنت مو منيح.

أنا: يه؛ طيب أنا كمان من مدينة حوالي ادلب وصغيرة ومع ذلك قلتلك

هلق شيلنا مني ومنك شوية… شو قصتهم الأدالبة بشكل عام؟

محدا منهم بسجل على حسابو “إدلب” حتى لو وهمي ولابقول إنو ادلبي

وبيحرف لسانو شي 100 درجة لما بتحكي معو صوت، غير مصطلحات الكتابة بتكون مفشكلة كمان.

ههههههههههههههه

هوي: ما بعرف شو بدي قلك؛ هو معك حق بس كمان بما انها اصغر محافظة وأكثرها إنغلاقاً

فممكن هالشي عم يعمل مشاكل مع الناس الي فيها؛ غير إنو في كثير من شبابها بيدرس بغير محافظات

لأني جامعتها خزيت العين… فبيكتبوا المحافظة الي عم يدرسوا فيها؛ ولما بيخلصوا بينسوا أو بيتناسو يغيروا البلد.

أنا: اي كمان فيها وجهة نظر… بس هلق بلا كثر حكي وخلينا نعرف من اي بلد أنا وأنت.

خيو أنا رح بلش… أنا من معرة النعمان. وأنت؟

هوي: أنا… مممممم… قريب عليك كثير…😛 … أريحا…

أنا: اي يلا نص ساعة منصير عند بعض… 

نور معراوي

Sgayrights@gmail.com

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: