أنا وهوي وهداك
أنا: لك أهلاً بالشباب، والله بعد زمان على هالجمعة.
هوي: أييييه، يضرب النت شو بيجمع.
هداك: أي والله بعد هالفراق نحنُ هنا على التشات.
أنا وهوي: لك أهلاً وسهلاً، شلونها أيامك وشو عم تعمل؟
هداك: لك أنا بألف خير وصحة، وعم حاول دور على شغلة تطالعني برا البلد.
أنا: ولوين بدك تحط رحالك بعدي، على آخر علمي ماكان بدك تتحرك من أرضك؟
هوي: وعلى أساس كمان البلد عندك مافيها شي والشغل تمام.
هداك: لك أي أي، بس أنا بدي أطلع وأبعد عن هالبلد المعفن، الي أهلوا داخلين بشي مية حيط.
وغير إنو كمان جد ماعنا شي، بس منسمع أصوات.
أنا وهوي: أصوات بس -____-، ويعني مافي شي؟ إذا الصوت مو لعندكم يعني مافي شي؟
هداك: لا تفهموني غلط ولو، بس هايدا الواقع، وأنا ما عاد أتحمل أبقا بالبلد وألعي قلبي أكثر من هيك.
هوي: أي حقك تطلع وتشوف أحلامك، بس مو تنكر الواقع، لأني الي بينكرو بقطعة أرض ما؛ بينكرو وين ما راح.
أنا: يسلم تمك، صحيح هالكلام، بدك تتهم الناس بأنهم داخلين بالحيط، بس قلي إيمتا حاولت أنت تختلط بيهم؟
هداك: شبكم فلتوا ما بقا تسكتوا؟ ما قلنا شي، بس إنو بدنا نسافر ونترك هالبلد المعفن، وهايد اشي مو جديد على طول كنا منحكي فيه.
أنا وهوي: أي صحيح كنا على طول نلت ونعجن بالموضوع، بس هايدا كان قبل ما يصير هالوضع الي بيخلي عنا مسؤوليات.
هداك: مسؤوليات شو أنت وياه؟ أنا ما عندي إيمان بكالشي صار ولا عم يصير، والي ما عندو هدف بيفشل والباطل ما بيلغي باطل.
هوي: تقبشني شوص اير فيلسوف على آخر الزمن؟ شي مو غريب منك إنو تحكي هالكلام، من طول عمرك هايدي آرائك.
أنا: هلق ما فيني أحكي شي ولا أعلق لأني لازم نضل أصحاب، بس بقلك شغلة، لا تنسى إنو الخروج بهدف الخروج هو مضيعة للوقت ومارح تقدر تعمل شي إذا ما عندك هدف واضح قبل الخروج.
هداك: خلص تقبروني، أنا بعرف بالضبط شو بدي ولوين طالع، ولا تشيلوا هم رح نضل على تواصل.
أنا وهوي: منتمنى هالشي يكون صحيح، وموفق حبيبنا بكل مشاريعك.
هداك: ……
أنا وهوي: الظاهر طفيت الكهربا عندو للولد.
هوي: ……
أنا: وأنت كمان، الظاهر إجا دونا، لنقوم نجهز لقطعة الكهربا نحنا كمان…
نور معراوي
Sgayrights@gmail.com
موالح 
اترك تعليقًا